ஒரு நோயைக் துல்லியமாகக் கண்டறிந்து உயிரைக் காக்க ஸ்கேன் பரிசோதனைகள் உதவுகின்றன.
ஸ்கேன் பரிசோதனை செய்துகொள்ளும் போது சிறிய அளவில் கதிர்வீச்சு பாதிப்புகள் இருக்கலாம்.அதன் நன்மைகள் கதிர்வீச்சினால் ஏற்படும் மிகச் சிறிய ஆபத்தை விடப் பல மடங்கு அதிகம்.
கதிரியக்கவியல் சிகிச்சைகளை எளிதாகக் கிடைக்கச் செய்யும் வகையில், சென்னை அடையாறில் உள்ள எம்.ஜி.எம் ஹெல்த்கேர் மலர் மருத்துவமனை, புற்றுநோய் மற்றும் இதய நோய்களை முன்கூட்டியே கண்டறிய சிடி இமேஜிங் தொழில்நுட்பங்களில் புதுமையான அம்சங்களை அறிமுகப்படுத்தி ஒரு மைல்கல்லை எட்டியுள்ளது. டீப்-லேர்னிங் தொழில்நுட்பம், மேம்பட்ட சிடி நெறிமுறைகள் மற்றும் கதிரியக்கவியல் நிபுணத்துவம் ஆகியவற்றை ஒன்றிணைப்பதன் மூலம்,நோய் கண்டறியும் தகவல்களின் தரத்தை மேம்படுத்தி,மிகக் குறைந்த அளவிலான கதிர்வீச்சைப் பயன்படுத்தி நவீன சிடி பரிசோதனைகளை மேற்கொள்ள இந்தப் புத்தாக்க உத்திகள் உதவுகின்றன.
கதிர்வீச்சு வெளிப்பாட்டைக் குறைப்பதற்கு அல்ட்ரா-லோ-டோஸ் சிடி மார்பகப் பரிசோதனை மற்றும் லோ-டோஸ் சிடி கரோனரி ஆஞ்சியோகிராபி ஆகியவற்றுடன் உகந்த மருத்துவ நெறிமுறைகளையும் இணைத்துள்ளது. இந்த சிடி இமேஜிங் செயல்முறையின் முக்கிய அங்கமாக டீப்-லேர்னிங் அடிப்படையிலான ‘டெல்டா’ இமேஜ் மறுஉருவாக்கத் தொழில்நுட்பம் விளங்குகிறது. மிகக் குறைந்த அளவு கதிர்வீச்சு மற்றும் குறைந்த அளவிலான கான்ட்ராஸ்ட் மருந்து பயன்படுத்தப்பட்டாலும், நோயறிதலுக்குத் தேவையான தரமான படங்களை உருவாக்க இத்தொழில்நுட்பம் உதவுகிறது.
மருத்துவ நெறிமுறை வடிவமைப்பு, பணிப்பாய்வு ஒருங்கிணைப்பு, படங்களைப் பெறுதல், மறுஉருவாக்கம், அளவு சார்ந்த பகுப்பாய்வு மற்றும் நோயாளிகளின் சிகிச்சைப் பராமரிப்பு ஆகியவற்றில் இந்தப் புத்தாக்க அம்சங்கள் முதன்மையாகச் செயல்படுத்தப்படுகின்றன.
கடந்த 10 நாட்களில் சுமார் 133 கரோனரி சிடி பரிசோதனைகளை மேற்கொண்டுள்ளது.குறைந்த அளவிலான கதிர்வீச்சுடன், ஒவ்வொரு பரிசோதனைக்கும் சுமார் 15 மி.லி கான்ட்ராஸ்ட் மருந்து மட்டுமே பயன்படுத்தப்பட்டுள்ளது.கரோனரி தமனிகளைத் துல்லியமாக மதிப்பிடுவதற்குத் தேவையான படத் தரத்தைப் பராமரிக்கும் அதே வேளையில், கதிர்வீச்சு மற்றும் கான்ட்ராஸ்ட் மருந்து ஆகியவற்றின் பக்கவிளைவுகளைக் குறைப்பதே இதன் நோக்கமாகும். இதேபோல்,260 நோயாளிகளுக்கு அல்ட்ரா-லோ-டோஸ் சிடி மார்பகப் பரிசோதனை செய்யப்பட்டுள்ளது. இவர்களில், பரிசோதனை முடிவுகளின் அடிப்படையில் 179 பேருக்கு அடுத்தகட்ட பயாப்ஸி பரிசோதனை மேற்கொள்ளப்பட்டு,அதில் 54 பேருக்குப் புற்றுநோய் இருப்பது உறுதி செய்யப்பட்டுள்ளது.
இது குறித்துப் பேசிய கதிரியக்கவியல் துறையின் மூத்த நிபுணர் டாக்டர் சாமுவேல் ரீஃபத் ஜே பேசினார்.
“ஒவ்வொரு முறை சிடி பரிசோதனை செய்யும் போதும், மருத்துவருக்குத் தேவையான துல்லியமான தகவல்களைப் பெற முடியுமா? மற்றும் நோயாளிகளுக்குக் குறைந்தபட்ச பாதிப்புடன் இதைச் செய்ய முடியுமா?ஆகிய இரண்டு கேள்விகளை எங்களுக்கு நாங்களே கேட்டுக்கொள்கிறோம். நோயாளிகளுக்கு ஏற்படும் பாதிப்பு என்பது கதிர்வீச்சு, அயோடினேற்றப்பட்ட கான்ட்ராஸ்ட், செலவு,நேரம் மற்றும் சில ஊடுருவல் பரிசோதனைகளுடன் தொடர்புடைய பதற்றம் ஆகியவற்றை உள்ளடக்கியதாகும்.
எனவே, வழக்கமான இமேஜிங் முறையில் இருந்து மாறி, மிகக்குறைந்த அளவிலான கதிர்வீச்சு வெளிப்பாட்டின் மூலம் அதிகபட்சமாக மருத்துவப் பயனுள்ள தகவல்களைத் தரும் ‘துல்லியமான இமேஜிங்’ முறைக்கு மாற நாங்கள் விரும்பினோம். இந்தக் கொள்கையே எங்களின் குறைந்த மருந்தளவுடன் கூடிய கரோனரி சிடி,மிகக் குறைந்த அளவுடன் கூடிய மார்பக சிடி மற்றும் செயற்கை நுண்ணறிவு உதவியுடன் கூடிய இமேஜிங் சோதனைகளை அறிமுகம் செய்ய உந்துசக்தியாக இருந்தது.
பாரம்பரியமான சிடி கொள்கைகளை நாங்கள் கைவிடவில்லை; மாறாக, அங்கீகரிக்கப்பட்ட கதிரியக்கவியல் மற்றும் இதயநாள சிடி தரநிலைகளுக்கு உட்பட்டு செயல்படுகிறோம். அதே வேளையில், ஒவ்வொரு தனிப்பட்ட நோயாளியின் மருத்துவச் சூழலுக்கும் ஏற்றவாறு பரிசோதனை அளவுருக்களை மேம்படுத்திப் பக்கவிளைவுகளைக் குறைத்துச் செயல்படுகிறோம்,” என்று கூறினார்.
தலைமை இயக்க அதிகாரி,குழுமத் துணைத் தலைவர் திரு. வேணுகோபால் பட் கூறுகையில், “எங்கள் தொலைநோக்குப் பார்வை தொழில்நுட்பங்களை அதிகரிப்பது மட்டுமல்ல; மாறாகத் துல்லியமான சுகாதாரப் பராமரிப்பை நோக்கி முன்னேறுவதாகும். மேம்பட்ட இமேஜிங் மூன்று கேள்விகளுக்குப் பதிலளிக்க வேண்டும்:
நோயை முன்கூட்டியே கண்டறிய முடியுமா? இன்னும் துல்லியமாக வகைப்படுத்த முடியுமா? மற்றும் பாதுகாப்பாகச் செய்ய முடியுமா? அடையாறு மலர் மருத்துவமனையை நவீன ஸ்கேன் செய்யும் மையமாக மட்டுமின்றி,சிறந்த மருத்துவ முடிவுகளை எடுக்க உதவும் மையமாகவும் நிலைநாட்ட விரும்புகிறோம்,” என்றார்.
மருத்துவ பரிசோதனைகள் குறைந்த கதிர்வீச்சோடு பாதுகாப்பாக இருப்பது முக்கியம். அதற்காக முயற்சி எடுக்கும் மருத்துவர்களுக்கு நமது பாராட்டுகள்!.
-ஷைலஜா. Health and beauty
